[128] EPISTOLA XXVIII.

IUSTUS LIPSIUS

HADRIANO VANDER-BURCH.

Alloquium tuum quam mihi gratum est, tam vellem occupatio & valetudo permitterent semper prompte respondere. Affectu certe facio, qui locorum aut temporum intervallo in te aut fratrem nihil mutat. Hoc ei, quaeso, dicito: & adde de carmine me satis facturum quid alacre aut Musicum valetudo permittet: quae sane ab his amoenitatibus jamdiu abduxit. POLLIONEIA sic inopinato abiisse, caussa filii doleo, quem ut amore, sic sensibus, optem mecum consentire. Sed heus tu, quid vos de consilio isto Regis novo, inopinato & paene supra fidem? atqui fidum certumque est, & recta ad exitum ibit. Utinam eas res tamdiu abjunctos vos jungat! utinam aditum & comercia, sed & convivia mutua aperiat! vivere in hac senescenti aetate novam incipiamus & juvenilem vitam. Sane si haec fideliter & feliciter patrantur, quid nisi caussa omnis dissidiorum & suspicionum a stirpe est excisa? Bonis & sapientibus facile persuadeatur, utinam & potentibus, quos DEUS eo flectat. CANTERUM & WILTIUM amice saluto, imo & CANTERUM filium (ut audio & gratulor) jam patrem. Lovanii. V. Id. Decemb. MDXCVI.